屋企人以往間中會到灣仔大榮華飲茶，結業後轉了做利景酒家，周末心血來潮就來試試點心如何。點心價錢算中位，款式都算多選擇，當然先來蝦餃燒賣試試師傅手勢，落單後都等了十多分鐘，明顯即叫即蒸，蝦餃皮薄通透，蝦肉爽口，燒賣大隻紮實有肉汁，唔錯噃。另叫咗叉燒腸，腸粉薄身叉燒餡多，雞扎都大件多料，係少少奇怪用鴨胸肉代替火腿。
見午餐有燒味飯，其中選擇係燒鵝雙拼，咦，有燻蹄，就拼燻蹄吧。又等多十幾分鐘，好期待，可惜嚟到是凍的，或許比燻蹄的凍影響了，燻蹄配醋好味，但燒鵝就減晒分。最後來個馬拉糕作甜品，發得好鬆，味道則一般。臨走見鄰座的鯪魚球及上湯鮮竹卷幾靚，下次下次。
利景酒家
灣仔史釗域道1號1樓
沒有留言:
發佈留言