2024年3月15日星期五

有蕎菜食啦

見到有蕎菜賣就知道近清明啦,蕎菜又名薤菜或藠頭,一年只係清明前後一個月當造,醃漬過就係平時係酒樓食到嘅蕎頭,尋日係土瓜灣見到立刻買一斤,一般多數用嚟炒燒肉,或者煮豆干,但今次早利亞就用梅頭半肥瘦嚟炒,蔥香味濃郁,飯都食多碗。
做法: ~蕎菜去根留莖,切段備用 ~今日的蕎菜葉唔算老,留了些嫩葉
~梅頭豬肉切片,生抽、老抽、少許糖、生粉醃半小時
~燒紅油鑊,下蕎菜爆炒幾分鐘至聞到香味即起鑊備用
~加少許油下薑片,聞到薑味後炒肉片
肉片8、9成熟時灒酒,嫩葉落鑊炒幾下 ~蕎菜回鑊,炒勻後上碟







 

facebook
https://www.facebook.com/juliatsui88/posts/pfbid02KPRxXcW2beFcLtvxvW4ywrjgGiURGFcb1Vp68h6QwMNqAd81vg7JCiYkXqZa9mpjl


足本介紹:- https://juliatsui.blogspot.com


請讚好我的專頁 可以收到更多新資訊
https://www.facebook.com/juliatsui88

也可以follow 我的 Instagram
https://www.instagram.com/julia.tsui/

#早利亞廚房

#早利亞的美食感覺


2024年3月14日星期四

潮式凍魚大眼雞

見到魚檔有多條大眼雞木棉魚,今晚不如做魚飯,買多樽普寧豆醬先。魚飯其實係無飯㗎,潮州人以魚當飯食因此得名。

記住要保留魚鱗,只係清理好內臟同魚腮就可以,返屋企徹底洗乾淨魚肚內血污,用廚房紙/毛巾印乾魚內外,粗鹽抹在魚身醃起碼一兩小時,處理好就唔會有腥味。

做魚飯有2種做法,有人隔水蒸,有人熱水浸熟,如果舖頭大量做多用熱水浸,加埋多種魚嘅精華令魚飯會更好味,今次我用家庭式簡單些嘅蒸熟,大火放入魚蒸10分鐘後,不要揭蓋,焗五分鐘左右,取出放涼起碼2小時,不要放雪櫃,否則肉質會變。進食時先揭開整塊魚皮,內裏的魚肉嫩滑多汁,蘸普寧豆醬更滋味。

2024年3月12日星期二

粉嶺畢打奧

間中都有去上水食畢打奧,餐廳提供西式扒餐,最愛T骨扒。今次到粉嶺,原本想去Deluxe,點知見到對面開咗 Better Ole,睇清楚,真係上水畢打奧開分店,一邊英式酒吧另一邊餐廳,餐牌吸引,價錢仲平過Deluxe,一定要試試啦~

點完餐,望望店子,除環境舒適外,就連提供的刀子也非常講究,食扒的過程絕對係好嘅體驗。餐湯餐包都是港式味道,主菜我哋揀咗3款唔同風格,鮮椰汁咖哩牛腩飯,可配雞肉或溫泉蛋雜菜,咖哩香牛腩夠腍,接近港式味道。年青人揀咗鐵板餐,美式什扒包括有新鮮市場豬扒、薄牛扒、雞扒拼煙肉香腸,質素唔錯有誠意,絕對唔係坊間咁拼拼湊湊。而早利亞就揀咗美國10安士肉眼扒,見到扒中心的脂肪嗎?入口肉味濃郁,熟度滿意,非常唔錯,值得再嚟。





















畢打奧餐廳
粉嶺和豐街22-26號地舖

2024年3月11日星期一

旺囍好多款雞外賣

街坊介紹外賣可試試旺囍雞飯,到舖頭見有多款雞選擇,古法頭抽雞、原味清遠雞、四川麻辣手撕雞等,最得意係爆荽雞,問店員原來雞內放芫荽蒸煮,下次可以試,今次就睇中藥材滋補三黃雞,套餐$52 係四分一隻雞,可配飯或菜底,即淨菜,即叫即做,所以要預等一陣。回家打開盒雞已聞到藥材香味,仲有些藥材係面,湯汁都有濃濃藥材香,配飯一流,雞肉嫩滑,呢個價位幾唔錯噃~

題外話,跟我後面姐姐買咗半隻雞,原來下午買滿$90有8折,好抵













旺囍 
土瓜灣北帝街12-14號地下6B號舖

2024年3月6日星期三

B for Bakery, Better, Bread, Believe…花朵千層撻

憑著花朵形狀蛋撻成為人氣烘焙店,官方網頁話 B 代表 Bakery, Better, Bread, Believe…有別其他西式或日式路線,Hashtag B以港式烘焙為基礎重新注入創新設計,例如菠蘿包系列,除原味外,還有芝麻、抹茶、伯爵茶口味,仲有最新的檸檬茶菠蘿包。講返花形拿破崙焦糖千層撻,27層拿破崙千層皮要預先焗製,加入蛋漿後再焗一次,成品外層酥脆,內餡有蛋香,甜而不膩,而且可熱食或凍食,凍食的話最底層的焦糖會比較脆身,熱食焦糖味就更突出,也變得較甜,跟杯齋啡會比較夾,其實早利亞覺得唔似蛋撻或葡撻,根本就係拿破崙千層蛋糕及焦糖布甸的混合體

店子近期推出柚子千層撻,用招牌撻皮,加入軟滑忌廉芝士,面頭加層柚子醬,內餡輕盈唔膩亦唔太甜,夏天食都幾清爽。

店子仲有多款方包如特濃朱古力雲朵、抹茶紅豆雲朵、琥珀無花果麥雲、雙重芝士雲朵等,比起傳統麵包店發酵兩次,雖然色彩多,但強調無人造色素及防腐劑,有機要試試。




















Hashtag B 
銅鑼灣利園山道73號寶榮大廈地下F號舖 

2024年3月1日星期五

Tai Tai Pie Pies made in HK

久不久早利亞就會想食 Pie,無論白汁雞批、牛肉批或羊肉批,比較方便嘅選擇係 Marks & spencer 售賣嘅急凍pie。而今日就專程到金鐘買新鮮香港製造嘅肉批,新鮮製作,有人情味在內,係比較滋味㗎,雖則價錢稍為貴d,不過今日見到有幾款批特價7折好抵,最後買咗最想食嘅健力士黑啤牛肉批及咖喱雞肉批。回家入爐 180度焗約半小時,記得脫去錫紙模,皮就會焗得更鬆脆。切開餡料香味撲鼻而來,牛肉批啤酒味好出,咖喱批香辣惹味,最後迷你蘋果批亦做足本份有肉桂香,好滿足呀~















Tai Tai Pie Pies
金鐘金鐘道88號太古廣場LG1樓Great Food Hall


facebook
https://www.facebook.com/juliatsui88/posts/pfbid0vA6dbqBYMGNBi6vTv3qC2S3GNuuxnQf3nDHXYmFVBCWKGmvqEUgJAP4HxWUD42tjl


足本介紹:- https://juliatsui.blogspot.com


請讚好我的專頁 可以收到更多新資訊
https://www.facebook.com/juliatsui88

也可以follow 我的 Instagram
https://www.instagram.com/julia.tsui/

#早利亞廚房

#早利亞的美食感覺