早利亞的美食感覺: 人氣海南雞飯

2023年7月19日星期三

人氣海南雞飯

早前去上環辦事，趁機到人氣海南雞飯店勇記食午餐，預咗早一點到為咗碗椰子雞湯。早前朋友回港想食海南雞飯，其他朋友都推介這家專門店，朋友試過後立刻變成飯堂，幾乎每星期都到此嘆一餐。

話說回來，午市時間高朋滿座，店外一條隊排堂食，另一邊排外賣，早利亞一人比較易搵位，入座即點一客海南雞飯跟足料椰子湯，每天限量，若然湯沽清後會轉花茶，就睇你與湯有無緣份。

由前君悦廚師主理的招牌去骨泰式海南雞飯 $66，賣相相當吸引，價錢親民但份量足，每份平均有雞胸雞翼雞髀各部位，勇記特別選用2.5斤重的三黃雞，用特製滷水浸熟，口感皮爽脆雞肉嫰滑，油飯用香茅大蒜南薑斑蘭及雞油蒸熟，香而不油膩，粒粒分明，口感軟糯，加乾蔥更香，再配碟秘製泰式酸辣醬汁，雞胸肉蘸汁好惹味。而傳說中的椰子雞湯果然清甜，椰子味香濃，沒有味精感覺，值得為此早些到來。