非常難訂位的人氣米芝蓮推介小店合時小廚，因有人臨時取消，好朋友執雞頂上， 早利亞就幸運地可以享受一個美味的午餐。一早預訂了多道拿手菜式，
先來杏汁豬肺湯，呢個湯要先處理豬肺又要磨杏仁，功夫多多真係要出街食，每人一大碗，杏香湯濃，多件豬肺好足料，若然再過濾幼細點口感會更佳。店員送上茶皇雞，煙燻香味樸鼻而來，店子用多款茶葉煙燻而成，茶香主要集中在雞皮，隔離女士平時唔食雞皮，今次都要破例一次了。雞肉嫩滑，雞雜甘香，店員建議蘸點醬汁更好味，增加味道層次。招牌菜百花蝦多士新鮮炸起，入口香脆唔油膩，原隻大蝦加蝦膠厚身彈牙，大大件好滿足。雞油花雕蒸馬友，花雕好香，雞油又沒有油膩感，馬友足夠油份肉嫩滑溜。
稍為休息一下，薑蔥焗肉蟹煎腸粉，上枱後店員翻動撈勻，肉蟹啖啖肉，但最入味係這道菜的主角－腸粉，吸收晒蟹香及薑蔥香，禁不住一件接一件放入口。
最後係焗少爺豬扒飯配煎蛋，其實已經很飽，但又無理由唔試，一試就停唔到口食晒成碗，番茄醬汁跟芝士等非常調和，有朋友覺得比較濕，或許飯底再加厚點就比較爽身，味道則剛好，茄香恰到好處。閒談間問負責人，原來訂位要到年尾才有位，每道菜都做足功夫，要預約半年的飯局，值得等。
合時小廚
西灣河筲箕灣道39號
沒有留言:
發佈留言