早利亞的美食感覺: 新人氣小店餃撚店

2021年3月27日星期六

新人氣小店餃撚店

人氣小菜館楚撚記大排檔嘅新line餃撚店，顧名思義係賣餃子，日日新鮮人手包製，餡料有創意，今次就外買咗一打生餃子，附送辣菜甫，辣椒油及黑醋，一次過試咗六款味道。

外賣盒設計不錯，餃子保持完整，皮厚薄適中唔易散，好好煎。黑松露什菌餃入口黑松露味較淡，什菌反而好香，另加入蘿蔔及木耳增加口感。蝦米香菇翠玉瓜豬肉餃，翠玉瓜清淡，蝦米香味突出。西洋菜鮮蝦豬肉餃同坊間西洋菜餃比較，加了蝦肉較爽口鮮甜，幾好食。東北京蔥羊肉餃孜然等香料味道相當濃，有點蓋過羊肉味。雙重芝士粟米鮮蝦餃，芝士味不過重，同粟米鮮蝦味道拿捏得恰到好處，有半溶效果，啱晒芝士控。最後的椰香荔芋臘腸香菇餃，臘腸及芋頭滿滿，好特別。店子有兩款甜包點，傳統蛋黃蓮蓉壽桃及黑金流沙奶黃壽桃，今日試咗黑金壽桃，蒸熱後奶黃餡呈流沙狀態，食嘅時候要小心，味道都唔錯。