結業潮蔓延至中式傳統餅店，40年老字號「順香園餅家」即將結業，早利亞最唔捨得係香港唯一手製馬仔已停產，附近小店都已無貨啦。店家出品都係香港廠房人手製造，不含防腐劑，新鮮出品，過去有不少餅店都會一板板咁擺賣，早利亞去大埔就一定買幾件返屋企慢慢嘆，係唔少人嘅美好回憶。順香園八十年代馳名港澳，可惜不敵時代巨輪，隨師傅退休後，唐餅都要停產了。今日喺小店只見到有少量西樵大餅，其實都唔係正宗咁大隻，比光酥餅大些少，一次過食一隻都唔會太飽，手工嚤囉酥，比坊間細粒些，用酥香餅皮包住冬瓜蓉，咬落煙煙韌韌的。芝麻餅質感香脆，入口香甜有芝麻香。雞仔餅有2款，大粒及細粒，外皮少少硬身，入口質感煙韌鬆化，餡料係肥豬肉加五仁，入口有南乳及豬肉香，鹹中帶甜。最後仲見有合桃酥、老婆餅、香蕉糕及香蕉卷，香蕉糕身非常軟腍，啖啖充滿香蕉味。「順香園餅家」將在中秋前結業，掛住唐餅嘅朋友，見到就買返2包食下啦～
沒有留言:
發佈留言