早前友人見網上有優惠就相約到灣仔陶源酒家食特色點心，三人行點了十樣點心，先嚟筍尖原隻鮮蝦餃及沙巴鮮蝦燒賣皇，蝦餃飽滿，有鮮味亦有筍尖粒，燒賣大件紮實，一口鮑魚鳳眼餃賣相吸引，早利亞先食鮑魚，慢慢咀嚼，有咬口但唔韌，可以喎，後食鳳眼餃，加埋裝飾的小蘆筍，唔錯噃。姬松茸遼參粉果晶瑩通透，外觀靚，菇味香，感覺似以前嘅上素蒸粉果。
翠綠小梨子其實係變奏版鹹水角，皮煙煙靱靱唔油膩，高湯魚肚鮮竹卷餡料豐富，不見天韮黃鮮蝦腸粉稍厚身，還好尚算滑及有米香，懷舊叉燒酥夠鬆，題外話，近期銅鑼灣幾間酒樓飲茶都唔見叉燒酥蹤影嘅。乾燒糯米釀雞翼係手工菜，做點心就細件些，只釀半隻中翼，每人一件，香口又唔會太大負擔，最後子薑皮蛋蝦春卷，第一啖以為普通春卷幾脆呀，食第二啖子薑就走出嚟啦，幾得意。整體好食，不過唔知係咪做咗宣傳，客人多咗，見到有些枱會有些意見，早利亞就順利無漏單呀～
陶源酒家
灣仔菲林明道8號大同大廈1-2樓
沒有留言:
發佈留言