早利亞的美食感覺

2012年11月30日星期五

我想念的羊奶凍

大半年前，到大漠食過兩次晚飯，感覺非常正宗新疆菜，對於羊癡的我，印象深刻。

今天再到大漠食午餐，本見到有特價午餐及提供學生價錢，心涼了一截，好在後來發現有新疆特色午餐，要了新疆羊鞍飯及羊腩麵，另加疆式羊肉炒飯及紅毛九芽羊肉煎油酥餅。

先來餐湯及餐茶，呢杯名為‘心心相印’的花茶，茶葉球浸在水中，慢慢地盛開成燦爛的花朵，單是欣賞已十分賞心悅目，而且茶味清香。羊肉煎油酥餅新鮮蔬菜十足，油酥餅香脆，一道十分好的前菜。主菜亦到了，羊鞍羊羶味香濃，羊腩亦充滿孜然香味，羊肉炒飯帶少辣，就是這香辣，令人停不到口，連唔食得辣的仔仔都一口炒飯，一啖水，太好味了。

甜品當然係羊奶凍，味道比坊間的牛奶布甸香濃幼滑，甜度適中，果然係我一直想念的。

大漠

土瓜灣北帝街27號C地下

注: 區內有多個咪表車位，可供停泊，亦可到欣榮花園停車場泊車。

2012年11月29日星期四

自製果皮牛肉燒賣

因很喜歡食果皮重的牛肉燒賣, 坊間不易找到有質數的，所以自家研究。終於做得比較成功，好開心呀^^

只係我買不到白皮, 只有用雲吞皮代住先啦...有無人可以話我知，邊到有得買呢？

得閒睇下我的專頁丫 ^^

https://www.facebook.com/juliatsui88?

2012年11月28日星期三

喀什米爾咖喱屋 Kashmir Curry House

年前係深水埗長沙灣道買了個牛肉薄餅，香又酥，一試難忘特式街頭美食。

今次到深水埗，路過北河街見有人聚集，八卦望下，係印度薄餅呀! 已八分飽的我依然忍不住要了一件雞蛋薄餅，淡淡蛋香，更嚐到薄餅原味。

喀什米爾咖喱屋 Kashmir Curry House
正店: 深水埗長沙灣道264D-G
分店: 北河街近公和荳品廠

注: 鄰近深水埗地鐵站，泊車可到長沙灣政府合署。

2012年11月27日星期二

公和荳品廠

什麼比豆腐更多食法？

要香，煎釀豆腐

要入味，浸釀豆卜

要甜品，可要豆腐花

要解渴，飲豆漿吧！

公和荳品廠

深水埗北河街118號地下

注: 鄰近深水埗地鐵站，泊車可到長沙灣政府合署。

2012年11月26日星期一

竹昇麵專家

特地來到試聞名已久的蝦子竹昇麵，落了單後先試獨家醃製的酸蘿蔔，甜酸適中，加了幾粒辣椒，立即開胃。

點了三碟蝦子撈，麵質彈牙煙韌，蝦子份量足夠，每條麵條也沾有蝦子鹹香味。水餃，豬肉蝦肉份量平均，加上少許木耳絲，近期我個人覺得最好食的水餃。牛根牛腩夠腍，鵝腸爽脆。

注: 竹昇麵是使用竹竿（廣東人因「竿」音不吉利而改稱「昇」）壓製的麵條，多是用鴨蛋做的全蛋麵。竹昇麵師傅坐在竹昇（一桿大茅竹竿）的一端，重複用力下壓竹昇另一端下的麵團，壓薄後再切成麵條。

劉森記麵家
深水埗桂林街48號地下

注: 鄰近深水埗地鐵站，泊車可到長沙灣政府合署。

2012年11月23日星期五

週末好去處梳乎厘餐廳

對上水唔多熟悉，行來行去係呢間最有眼緣，入去坐下廚房前，通過大玻璃可以見到廚師正忙著。要了兩個晚餐，再加一客白酒煮蜆。很快白酒煮蜆到，酒味香濃，蜆肉亦好新鮮香甜。主菜鴨脾椰菜卷及雞卷亦到，好少見西餐會有鴨脾，鴨肉嫩滑，其實好食，但不知為何會有陳記燒鵝的影子。椰菜卷製作認真，餡料先焗，包上椰菜再焗，功夫真不少呢!

餐廳招牌係梳乎厘，當然要試下啦，一個原味，一個薑味呀，唔該! 睇住廚師由蛋白開始打，放入焗爐，睇住佢升，真開心。我比較喜歡薑味，淡淡的，相對，原味比較甜。

梳乎厘 Souffle
上水馬會道170號地舖

注: 鄰近上水火車站，附近有咪表位，當日我地誤打誤撞，免費泊係對面上水游泳池停車場。

2012年11月21日星期三

盛記麵家

老板B哥把每月農曆十六日定為「長者開心日」，為沙田瀝源區內100位長者免費提供麵食，就是呢份暖意令我到來食個麵。店鋪內放了很多廢物再造的裝飾品，眼見有許冠傑，徐小鳳黑膠碟，寶物四處皆是，還有大量書本可以隨便拿來看的，人情味濃厚。

說回食物，要了雲吞麵，簡簡單單，雲吞爽，有蝦味，麵條軟硬適中。

還要提一點，醋不是紅浙醋，係鎮江黑醋，配麵條好夾呀。

盛記麵家
沙田瀝源熟食中心5號舖

注: 鄰近沙田火車站

2012年11月20日星期二

農家午市套餐

今天須要到上水，辦完事又到石湖墟市政大廈醫肚。

到聞名已久的農家意粉餐廳，試試市政熟食中心的西餐。已往曾經多次到農場餐廳食晚餐，所以都有一些情意結，想回味一下當年的味道。

今次叫了牛肝菌汁大蝦薄牛扒意連忌廉雞湯，湯及蒜茸飽立刻到，合格有餘。主菜反而等了十五分鐘以上，一定係落單後才煮的，一般快餐起碼都煎定扒啦。主菜到，汁濃，牛肝菌很香，蝦爽，一定係新鮮煎的，牛扒雖薄，但還保留了肉汁，以$43的價錢，真係物超所值。

農家意粉餐廳

上水石湖墟市政大廈2樓4號舖

注: 鄰近上水火車站

2012年11月19日星期一

果然係好到底麵家

不時在一田，吉之島及一些展銷會中見到 '好到底蝦子麵'，價錢比一般蝦子麵貴，都不大明白。今天到正宗好到底麵家品嚐後，方知底蘊。麵底靚，無鹼水味，雲吞爽，一口一隻剛剛好，只是須要快食，免湯汁令麵條過腍。

好到底麵家

元朗阜財街67號

注: 鄰近朗屏港鐵站或輕鐵大棠道站

2012年11月16日星期五

山澗會清新的一餐午飯

在網上見到關於山澗會資料, 知道係印尼私房菜, 今年六月, 邀約一班好友, 一行十一人到來, 老板葉先生一早已為我們準備好多款菜式, 多用他自家種的菜或香料, 葉先生很會用天然調味, 少鹽少油, 但可帶出食材本來味道, 糖水也用黑糖, 叫你食得放心。

自家種粟米海鮮湯 – 湯甜到冇朋友, 每人起碼三碗。印尼沙律加多加多翠瓜 – 充滿花生乾荵香。黃薑醬豬頸肉 - 黃薑醬不辣但香, 非常醒胃。銀魚仔大蝦茄子 – 就係多呢幾粒銀魚仔, 帶出整個沙律鮮味。椰子蜜糖煎魚 – 好享椰子味, 食落甜甜地, 原來葉先生話落了蜜糖’ 令到煎香了的魚都不會熱氣, 妙!菠蘿牛腩 – 出名作, 但可能我對呢味太大期望, 雖然香料好有東南亞菜特色, 可是不是我杯茶。荷葉飯 – 好豐富, 鮮蝦及蟹肉鮮味全滲入飯內。紫米露, 畫上完美的句號。