尋日行過土瓜灣東京烘焙，店子有好多港式麵包，亦有懷舊花餅包括早利亞好鍾意嘅荷蘭撻、黃梅醬蛋糕及朱古力三角蛋糕，估唔到除咗普通忌廉筒外，還有變奏的開心果忌廉筒。店子亦焗製月餅，款式比月餅專門店還多，傳統如雙黃/四黃白蓮蓉、金華火腿五仁、黑松露火腿五仁月等，迷你裝更有流心奶皇、黑松露流心、開心果流心、榴槤流心、碧螺春抹茶及椰子拿鐵咖啡流心奶皇月，真係幾有誠意及創意。
東京麵包餅食
土瓜灣譚公道57號地舖
2025年9月25日星期四
旺角百樂潮州酒家
今次飯局搵個交通方便中間位旺角東站上蓋嘅MOKO 百樂食潮州嘢，坐低飲杯功夫茶食點鹹酸菜開下胃先。一行10人，滷水鵝可以叫半隻 $750，滷水香鵝肉嫰滑。早利亞想食潮陽炸雙棗(中) $396，坊間潮州店多做蝦棗，百樂蟹棗都做得傳統，油溫控制得好，乾爽不油膩。幾款小菜炸鹽水豆腐 $128，韭菜芝麻餅 $88及香煎蠔仔烙 $168 都做得到位，再嚟幾道主菜，蘿蔔春菜煲 $168、沙嗲粉絲牛肉煲 $168、蒜子上湯浸時蔬 $128、梅羔醬排骨(例半) $270、潮州凍烏頭魚 $320，早利亞尤其鍾意梅羔骨，最後叫埋單尾乾煎糖醋麵 $168，大家都飲飽食醉好滿足，話時話，當日係星期四平日，但見店子座無虛席，連隔離北京樓亦熱鬧非常，或許旺區晚肆還是可以，希望慢慢各區食肆都復甦，大家多些搵朋友出街食飯支持下啦～
百樂潮州酒家
旺角太子道西193號MOKO新世紀廣場5樓523號舖
2025年9月16日星期二
泰泰新舖食物依然高質
很喜歡佐敦泰泰各種獨特自創菜式，早前喬遷至附近新舖，即刻約朋友嚟食一餐先。先嚟生蝦刺身 $138 及 魷魚遊戲 $168 熱下身，堅持用新鮮蝦做嘅生蝦刺身零舍鮮味，坊間雪藏貨沒有蝦頭的喔，而店子就連蝦頭都炸香，實行一蝦兩食。魷魚遊戲即魷魚沙律，用咗3款不同嘅魷魚，鮮魷魚筒、水魷及秘製小土魷，配上秘製沙律汁，酸酸辣辣好醒胃。一行 8人，蝦多士 $138/4件 要2份先夠滋味，蝦膠彈牙，用米通代替麵包，炸得香脆不油膩，黑金黃金入球 $143 ，用新鮮墨魚滑包著鹹蛋黃蓉再炸至金黃色，切開後造型看似熟蛋，入口外脆內爽彈，加淡淡鹹蛋香，黑色版本是加了墨汁的墨魚滑包著黃金皮蛋黃，一樣好好味。
主菜點咗青檸燒牛肉 $238，店子推介多一款星河燒牛肉 $238 ，比起青檸醬汁嘅酸辣，星河燒牛肉多一份胡椒香，配上豆角香葉用生菜包嚟食，又另一番感覺。粉絲蝦煲 $238 保持水準，最鐘意粉絲完全吸盡鮮蝦精華而且好乾身，食落依然爽滑。本來想食鴨肉生菜包，老闆介紹另一變奏版，小炒王生菜包 $138 加入韭菜粒及黃金皮蛋白粒更惹味，配上紫椰菜，又好夾呀。最後差點忘記的清邁酸辣羅非魚 $238，因為造型又名飛天魚，整條魚起骨切件炸起加泰式酸辣醬汁，友人見仲有生菜就包魚塊嚟食，多一點清爽。
店子飲品都做得好精緻洛神花沙冰，芒果沙冰及原個椰青沙冰都啱夏天飲，最後甜品芒果糯米飯滿足埋個甜品胃。
泰泰 THAI THAI Restaurant
佐敦庇利金街42號地舖
佐敦庇利金街42號地舖
請讚好我的專頁 可以收到更多新資訊
也可以follow 我的 Instagram
訂閱：
文章 (Atom)