2025年6月6日星期五

內街的東南亞餐廳馬泰

見灣仔內街有家店子，名字已經話你知係主打馬來亞及泰國菜式，今次轉轉口味食東南亞菜吧。三人行點了3個午餐，加咗2份小食，跟餐熱飲免費，特色飲品加 $10。

招牌海南雞飯 $78 先到，雞肉份量足亦夠肥美，油飯顏色比較黃，入口有香氣唔算油。海南雞喇沙 $78 喇沙惹味足料，一般女子應該食唔晒，最後到係早利亞點的街頭豬扒撈檬粉 $68，檬粉好大碗，豬扒大過塊面，香氣撲鼻而且入口鬆化，酸甜汁碌冧(Nuoc Cham) 稍為甜，早利亞鍾意酸d 更開胃。跟住上兩客前菜，馬來素菜春卷 $22 及馬來杏仁蝦餅 $28，比較來說主菜性價比前菜高，跟餐熱桔仔水及馬來特色手拉茶 $10 斑蘭椰汁冰 $10 都唔錯。總括嚟講食品唔錯，新鮮做起上菜算快，店員都友善，會再來。





















馬泰
銅鑼灣駱克道408號地舖

發佈者： 於 沒有留言:
標籤：

2025年5月29日星期四

粉嶺梅姐果園美食店

間中會去粉嶺揾食，如果想食小菜多會到這小店，今次嚟食炸子雞半隻，二人前，再加一道小菜已經夠啦。炸子雞即叫即炸，皮脆肉嫩熱辣辣，記得叫姐姐比碟淮鹽提味更好。店子專賣雞嘅菜式，由白切雞、蔥油雞、口水雞等，還有早利亞冬天至愛嘅客家黃酒走地雞煲或椰子雞煲打邊爐，成隻雞斬好擺上臺慢慢淥，雞肉又嫰又甜，食完暖笠笠。

講返今天點嘅另一道客家鹹菜炆豬肉非常啱佐飯，鹹香惹味，豬腩肉肥美甘香，真係食多2碗飯都未夠。




























發佈者： 於 沒有留言:
標籤：

2025年5月22日星期四

潮江春二人餐


星期天約了家人到潮江春飲茶，見到有個午市點心二人套餐，當中菜式可以選燒乳鴿好吸引，我哋三人行就點一客套餐加多幾款點心吧。

食住鹹菜等，呢個特色鹹菜有別傳統潮式鹹酸菜，份量足，收費 $20 都抵。點心拼盤先到，包括蝦餃、蟹籽燒賣及潮州粉果。跟住滷水鵝片拼海蜇，滷水香海蜇爽口，墊底豆腐都好入味。

之後嘅前菜三款可選一包括香芒沙律蝦球拼韭菜餅各2件、花姿卷拼酸甜果肉各2件或燒乳鴿一隻，我哋選後者。乳鴿炸得香口肉嫩有肉汁，最後單尾有4個選擇，干炒牛河、瑤柱珍菌炆伊麵、瑤柱蛋白炒飯或方魚瑤柱肉碎粥，雖然份量比正常單叫細碟，但都好足夠。多點蜂巢芋角，外皮炸得好鬆，芋頭亦香，潮州店就食埋芋絲春卷，比鮮蝦又另一種味道，而香茜牛肉腸皮滑味道恰如其分，感覺店子點心都係有心機做，茶錢$17/位，坐得舒服，整體食得滿足。



























潮江春
銅鑼灣駱克道463-483號銅鑼灣廣場二期2樓

facebook
請讚好我的專頁 可以收到更多新資訊
也可以follow 我的 Instagram




發佈者： 於 沒有留言:
標籤：

2025年5月16日星期五

王朝潮順館 (得寶商場)

約埋一班朋友嚟食飯，店子主打潮州及順德菜，預訂了濃湯花膠浸海斑及百花雞，朋友帶咗支柚子酒，再多點一些香口小菜，傾下飲下放鬆下。先嚟威士忌乳鴿 $168，肉質嫩滑有酒香，賣相又靚。椒鹽鮮魷 $148 炸得鬆脆，魷魚鮮甜軟滑。百花雞半隻 $218 反而無想像中咁香，中規中矩，蘸汁食比較好。白灼新鮮鵝腸 $128，鵝腸芽菜爽脆。濃湯花膠浸海斑 $468 湯鮮甜，花膠份量十足，海斑起片浸熟得剛剛好。朋友想試脆皮牛腩 $238，記得早利亞喺金陶軒第一次這菜式，今次潮順館做嘅版本粉漿炸得厚一點，還好牛腩夠軟腍入味。最後嚟個菜，白蜆魚肚蝦乾浸勝瓜 $128，落咗蜆再加勝瓜都知道湯會甜，唔錯唔錯。

甜品炸奶卷 8條 $102 及椰汁西米丸 8件 $96 都可以跟人數落單，椰汁西米丸好特別，咬開仲係流質嘅西米露，不過大家都比較喜歡炸奶卷，外脆內嫩滑，難怪朋友想再 encore。






















王朝潮順館
九龍灣牛頭角道3號得寶商場地下A7號舖
發佈者： 於 沒有留言:
標籤：
訂閱： 文章 (Atom)