早利亞的美食感覺: 安南越式牛肉粉

2024年6月12日星期三

安南越式牛肉粉

約朋友到灣仔，朋友提議食越南Pho，咁就試試安南越南牛肉粉，原來安南係始創於2000年嘅品牌，有4家分店，以獨特牛骨湯配方聞名，咁一定要叫生牛肉湯河粉。先嚟前菜越式蒸粉卷，皮薄隱約見到豐富嘅餡料，上面放咗好多乾蔥，加點魚露甜酸汁 Nuoc Cham 好滋味。跟住嚟生牛肉湯河粉，其實淋熱湯後牛肉都半生熟了，牛骨湯都香但唔算濃，安南金邊湯粉有扎肉、鮮蝦及肉碎，不過食落好似係香茅豬扒切碎，加點香茅味唔錯，呢碗湯底就唔係牛骨湯，味道稍為清淡些，最後的安南海鮮炒金邊粉材料豐富又唔會太鹹唔油膩。店子午市有優惠套餐，有些粉麵有餐飲送，呢餐埋單$269，性價比唔錯喎。