早利亞的美食感覺: 富山麵家朝聖

2022年10月26日星期三

富山麵家朝聖

今次去咗朝聖，為打卡而嚟，你哋鍾唔鍾意 Cinnamoroll 先？慶祝Cinnamoroll 二十週年，銅鑼灣富山麵家由10 月起至年尾同 Cinnamoroll 合作推出多款限定拉麵、沾麵及飲品，店子處處有玉桂狗的蹤影。早利亞湊熱鬧，平日中午嚟到乖乖排隊，好快就安排到座位，雖然環境好可愛，不過食物都要吸引先得，店子係「東京拉麵秀」連續五年稱冠，佢哋嘅冠軍黑醬油拉麵 $88 湯底香濃醬油味道係唔錯，唔會太濃太搶味，而白鹽蝦拉麵 $88就一般啦，湯嘅蝦味無想像中咁濃，好彩有些櫻花蝦增添香氣及口感，厚切叉燒肥瘦雙間，軟腍入味，麵質中等偏硬，喜歡腍身可能要同店員講一聲。餃子$42 都煎得香嘅，飽滿有肉汁，又係用 Cinnamoroll 碟送上，食都食得開心。同場對面兩女子必定係fans，點了限定拉麵之餘還有兩杯特飲，一定好滿足。