2023年10月12日星期四

7仔燒賣升呢

早前「7 仔食檔」做咗次特價 $11/10粒魚蛋或燒賣，主要想比大家試下新配方，早利亞就買咗雙拼，好鍾意新配搭嘅醬汁同新配方嘅口感，店子表示採用多款魚肉製成魚漿，由老字號綿香廠房獨家調配蔥香豉油及秘製有渣辣椒油，早利亞就要求辣椒油另上，而沙爹魚蛋亦配上獨家配方綿香嘅沙爹醬，非常惹味。

今日再買已經係原價$16/10粒，依然抵，早利亞自備2個盒仔，唔想撈亂2款醬，嘥咗就唔好啦。同姐姐傾咗幾句，佢啱啱喺度做咗約10年，$11 係當年嘅價，之後 $1 、$1咁加到依家，轉咗新配方後，魚蛋燒賣足足賣多咗一倍，可想而知大家都幾鍾意呢個改良版。






facebook


請讚好我的專頁 可以收到更多新資訊

也可以follow 我的 Instagram


發佈者： 於 沒有留言:

2023年10月7日星期六

韓式外賣@沙田新城市

新城市睇完戲，唔想食咁full，諗起呢家韓式外賣店，買客飯捲返屋企慢慢食吧～店子門面已見好多韓式前菜及 Kimchi 泡菜，任君選擇，亦有唔同口味炸雞，而飯捲有炸蝦、豬扒、魚糕及芝士，早利亞最後選咗牛肉飯捲，賣相靚仔，入口又好味，口感清爽，份量足，$50 抵食～












發佈者： 於 沒有留言:
標籤：

2023年10月3日星期二

下午茶@Dan Ryan

十幾個朋友約埋飲下午茶聚舊，今次係飲西茶，揀咗去尖沙咀Dan Ryan，有人要求食焗薯皮，咁多人，樣樣都想試，先嚟 2個大拼盤－Chicago combo 芝加哥拼盤 $318，包括有Onion Rings 炸洋蔥圈、Cheesy Baked Potato Skins 芝士焗薯皮、Buffalo Wings 水牛城雞翼，而拼盤跟三款醬，Blue cheese dip 藍芝士醬、BBQ sauce BBQ醬及Sour Cream 酸忌廉。

再叫多幾款小食 share share，Cheese and Ham Wodden 火腿芝士盤 $138、Beer Fish & Chips 啤酒黃金炸魚 $228 及Sweet Potato Fries 番薯薯條 $64。到飲品，各自點咖啡、茶或啤酒，但早利亞想飲熱的，咁不如叫個湯，呢款湯用麵包做碗好特別，就咁話，England Clam Chowder 蜆肉周打湯 $88 材料足味道恰到好處，不過稍傾一陣，麵包已吸收大部分湯，雖然唔影響味道，不過下次知道呢個湯要快點飲喔。

最後點咗2見蛋糕作甜品，Classic Carrot Cake 傳統芝加哥甘筍蛋糕 $108 好大件，味道足，質感濕潤好好食，In-House Baked New York CheeseCake 自家製紐約芝士蛋糕 $95 啖啖芝士味但唔覺腻，口感細緻，甜度剛好。

每款食品都做到本份，但未算精采，甜品印象比較深，餐廳服務倒很貼心，環境寬敞，大家傾得好舒服好開心～




















Dan Ryan 尖沙咀廣東道3-27號海港城海運大廈3樓OT315號舖

發佈者： 於 沒有留言:
標籤：

2023年9月28日星期四

無印良品

九龍灣德福二期MUJI無印良品，衣食住行乜都有，多款即食咖喱配即食飯或薄餅Naan麵粉及即沖湯品令生活好方便，迷你日式超市有「食材市集」及「茶米工房」，好多都係日本直送，甚至日本農場直送。

MUJI挑選來自北海道、山形縣及長野縣的稻米，共有白米、五分米及玄米三種，全都是以天然方式種植，原米來港，再進行精米工序，非常新鮮。茶葉方面，由專業茶藝師搭配出適合於各時段飲用的調配茶，享受大自然的香氣，本月推薦茶飲有適合早上飲的接骨木花洋甘菊阿薩母紅茶及適合午後飲的琉球桂花紅茶。

早利亞行一個圈都忍唔到手買咗零食同即烘麵包做早餐，鯷魚意大利軟心包鹹鹹香香好特別，回家入爐烘熱會變回脆皮，口感更好，而黑芝麻黃梅合桃包餡料足亦有芝麻香，讚。嚟緊11月MUJI旗艦店將會係皇室堡地庫開業，佔地超過二萬呎，好期待喔～
































無印良品 九龍灣偉業街33號德福廣場2期4樓401-402 & 431號舖




發佈者： 於 沒有留言:
標籤：

2023年9月26日星期二

質素依然@皇仁舊生會

朋友幾個月前已訂好一圍，好榮幸叫埋早利亞一齊品嚐皇仁舊生會師傅手勢，我們一行十人，獨立房間，簡約裝修，非常舒適，今晚張菜單，見到都流口水。

先嚟百花流心蝦多士，表面同其他蝦多士差不多，蝦膠包得厚厚的，小心咬開，原來裡面係芝士，呈流心狀態，味道又夾。跟住就係早利亞最掛住嘅糖桂花加拿大桶蠔，桶蠔大隻肥美，煎得乾身，蠔肉飽滿，鹹鮮味濃帶桂花香，千祈不要忘記底下的洋蔥，也很滋味。 

跟著店員送上一個很大的湯盅，佛跳牆係皇仁嘅馳名菜餚之一，他小心翼翼揭開，湯的濃郁香味一湧而上，湯內最頂放了兩串鮑魚，內裡還有火瞳、老雞、厚身香菇及雞腳等，確實真材實料，環保原因走魚翅，這版本依然好濃郁。

跟住幾道菜式都做得恰到好處，黃沙豬潤枸杞菜，豬潤厚切熟度剛好。椒鹽陳皮中蝦，椒鹽香口，每隻蝦肉又帶有陳皮香。豉油王煎鷹鯧魚，煎得脆身有魚味而唔腥，連唔多食魚嘅朋友都起筷食多件。脆皮炸子雞，皮脆肉嫩。

單尾係聞名的潮式芋頭炒飯，炒得粒粒分明又惹味，怎樣飽也吃得下一整碗。最後甜點係腰果露湯圓，生磨腰果露加湯丸，難得不過甜而又可帶出合桃果仁香，坊間行貨就只有用甜味蓋過一切了。

成餐個個都食得好滿足，這兒只招待會員，聽聞訂位名冊已到出年，希望快快有緣再聚，值得期待。
























皇仁書院舊生會﹝中菜部﹞ 銅鑼灣高士威道120號

發佈者： 於 沒有留言:
標籤：
訂閱： 文章 (Atom)