今日三人行專程到深井食燒鵝，跟據以往經驗，早利亞最後都選擇裕記。半隻燒鵝$330 ，再點兩碟小菜，食住花生睇餐牌跟住等食，突然諗到鯪魚球，即刻叫多份。
燒鵝先到，第一時間叫碗瀨粉，食兩件鵝，食啖瀨粉飲啖湯，之後落埋碟下的鵝油撈瀨粉，油香豐富好滋味。燒鵝新鮮熱辣辣，鵝味比一般坊間的濃香，鵝皮酥脆帶少許油脂，啖啖肉的鵝髀留比年少男士，而早利亞則喜愛近腹腔的部分，香料味道更濃。
兩碟小菜跟住到，薑蔥蜆蚧牛肉 $130 好夠鑊氣，薑蔥蠔香，牛肉大片，處理得好非常嫩滑，蜆蚧味就未見突出。琵琶豆腐 $105 賣相靚，影完相都仲燙口，香嫩，淨食送飯都好味。後加的蜆蚧鯪魚球$112 明顯剛炸起，粒粒圓碌碌好吸引，整個放落蜆介醬，香口彈牙，鹹味適中。整餐飯都食得開心，店員亦非常友善。
裕記大飯店
深井深康路9號地舖
註: 附近有裕記專用停車場，提供兩小時免費泊車
註: 附近有裕記專用停車場，提供兩小時免費泊車
沒有留言:
發佈留言