早利亞的美食感覺: 早稻腸粉同場加映舊餅店角仔

2023年1月20日星期五

早稻腸粉同場加映舊餅店角仔

一早聽聞土瓜灣有一家石磨腸粉餡料好特別，餡料可選安格斯牛粒、黑豚肉都有，而且口碑唔錯，今日專誠到來一試，店子即叫即拉，需要等一段時間，食好嘢等一陣都值得，又因為只做外賣，腸粉到手後即飛快回家食，希望盡量保持質素，結果都好滿意，皮薄又滑，韭黃鮮蝦腸 $26 及手切牛肉腸 $26 ，蝦唔算大，牛肉唔算多，但做足本份，加少少自家豉油，調味適中，好食。而我最鍾意嘅係西班牙照燒黑豚肉腸 $30，肉香腸粉滑，本以為嘩眾取寵，估唔到又ok 喎，下次可以試埋安格斯牛。

經過一家舊式餅舖，見到店員密密手包角仔，仲有豆沙角，忍唔住買咗半磅試試，回家氣炸數分鐘回復狀態，雖不及生隆百事吉，但價錢平一半，早利亞一口氣食咗2隻，抵食，支持小店。