早利亞的美食感覺: 傳統潮州味道@瀝源街市

2020年9月28日星期一

傳統潮州味道@瀝源街市

行完新城市後經過瀝源街市想買點菜，隱約見到街市入面有家小店售賣正宗潮汕鹵水食品，除提供鹵水鵝 $96斤、鹵水鴨$55半隻外，還有多款如鵝掌、鵝翼、豬頭肉、豬耳、鹵水蛋等，地方企理，擺放吸引，一於買些今晚加餸。

老闆是潮州人，原來鹵水已有廿多年歷史，全部鹵味也是自家製作，店內有3個大煲，一煲專門滷鵝滷鴨，一煲做其他食材，最後一煲做沙薑黃油雞$78隻，還有秘製潮洲酸菜及菜脯，買滿$20就有得送其中一款。鹵水鵝香，鹵水鴨肉質軟腍，各有所好。還有鵝頸，$35一條，可要求潮州一段段切法，送酒一流。

夾夾下我都揀了八款，老闆細心，切得像潮州酒家拼盤般靚，上層鹵水鴨片、鹵水豆腐、鹵水蛋，下層鵝翼、豬耳、豬肚、金錢肚、鴨腎。鹵水鴨、豬肚、金錢肚等香軟嫩滑，豬耳鴨腎爽口入味，實在太豐富，而且價錢實惠，真是加餸好選擇。回家轉落碟，煮熱附送的鹵水汁，臨食前淋上，蘸點蒜蓉醋，美味又划算，性價比高，下次來沙田附近會再來買。