早利亞的美食感覺

2013年4月12日星期五

生原創蛋包飯 Omerice

已一段時間想到天后食蛋包飯，經過商討，我地一行三人叫了三色蛋包飯，綠色的鮮帶子菠菜蛋包飯，黑色的墨汁海鮮蛋包飯及正常黃色的和風牛舌蛋包飯而再加 $18轉流心蛋。

期待一陣子，流心蛋包飯先到，店員切開再灑上紫菜粉，蛋汁流出，見到滑滑的，入口好香好滑，飯亦有牛舌粒，配上咖哩汁，正！另兩個蛋包飯到，蛋香滑係起碼要做到的事，最驚喜係d飯，帶子味鮮，墨汁海鮮亦味夠濃，配白汁相當襯。

生原創蛋包飯 Omerice

天后清風街3號地下

注: 鄰近天后站，附近有時租停車場。

2013年4月8日星期一

文華雞飯（新加坡）

到文華雞飯食晚飯，一定要試海南雞飯，呢度分白雞或燒雞，要了白雞、肉骨茶及叻沙蝦。油飯算合格，雞滑但沒有雞味，三式醬ok。叻沙蝦微辣，不算太香，只有兩隻蝦，又不爽，孤寒了點吧。肉骨茶藥材味還算重，但肉鞋得沒有話說。失望，Sorry，沒有下次了。

文華雞飯（新加坡）
天后琉璃街7號柏景中心地下

注: 鄰近天后站，附近有時租停車場。

2013年4月5日星期五

Olive Cafe

到荃灣搵食，週末想食個靚午餐，聽聞 Olive Cafe 可以喎，試下先。要了個美國黑毛豬扒及燒春雞意粉。餐湯同沙律到ok，好有誠意。主菜肉汁豐富，醬汁味道都恰到好處，真的不錯。最後還有 cream puff 小甜點，雖知好多呢個級數的餐廳都唔再係午餐送甜品，而且味道及溫度都剛好，立刻對餐廳留個好印象。

Olive Cafe

荃灣楊屋道1號荃新天地UG41號舖

注: 近荃灣西站，可能巴士會好d，荃新天地有時租車位。

2013年3月31日星期日

有朋自遠方來，當然要找個地方傾下計，食得舒服點，就到 JW Marriott The Lounge 食個 Tea Buffet。食材固然靚，重要款式多多。

魚生卷物新鮮，沙律尤其以大蝦芒果沙律較為出色，英式烘鬆餅充滿牛油香，中式點心個人喜歡牛肉同春卷，即煮熱食的有生滾粥及餃子麵，熱食包括有鱸魚、羊架、牛肉煎餅、意粉等。甜點更多不勝數，不能盡錄，而且樣樣出色，每一樣食一個 round，小妹都未能做到，下次一定要再來。

The Lounge (JW Marriott Hotel)

金鐘金鐘道88號太古廣場香港JW萬豪酒店大堂

注: 鄰近金鐘站，太古廣場有時租停車場。

2013年3月28日星期四

我的麵包布甸

下午肚子又打鼓啦，昨天食剩兩塊麵包，加奶加蛋焗一焗，麵包布甸準備好。還欠我的至愛Custard Sauce，煲奶加吉士粉，攪攪下，有得食啦。

得閒睇下我的專頁丫 ^^

https://www.facebook.com/juliatsui88?

2013年3月25日星期一

81

見到博洛尼亞的招牌有個81字樣嗎? 係佢地出名的 81層丹麥麵包，當然一定要試。友人鍾情漢堡，而我則要了個蘆筍野菌意粉。等了好一陣，漢堡先來，沙律新鮮，包烘香，牛肉有肉汁，薯條鮮炸，完全無油。而我的意粉則有招牌丹麥麵包，單烘一面的多士，又香、又脆，口感鬆軟，見到橫切面一層層的紋理，叫人心動。蘆筍野菌意粉亦非常有水準，七八十元一個午餐，還有海景送，讚！

博洛尼亞 BO-LO’GNE Café & Bar

尖沙咀廣東道17號海港城海運大廈 LCX 3樓33號店

注: 鄰近尖沙咀地鐵站及天星碼頭

2013年3月19日星期二

牛陣 GyuJin

今天家人提議到牛陣火鍋，話抵食又多選擇，心想幾十蚊午餐有什麼食呢 ? 就帶住懷疑心態去試。

蔬菜、菇類、冰豆腐、芽菜都好新鮮，魚蛋好彈牙，好正。肉就只有一碟，豚肉片比牛肉片出色.。烏冬拉麵任君選擇。醬料包括豉油、醋、麻醬、芫莤、蔥花、生蒜及指天椒粒，都算豐富。

午餐$58，雖然只有一個鐘的時間，就當食一個好豐富的車仔麵，還有任食Haagen Dazs雪糕，絕對抵吃。

牛陣 GyuJin
銅鑼灣軒尼詩道489號銅鑼灣廣場第一期3樓301-303舖

注: 鄰近銅鑼灣港鐵站

2013年3月15日星期五

山地人越南法包專門店

突然好想食法飽，想起北角有山地人，立刻坐叮叮去。山地人的即叫即焗法包有原味、黑麥芽同竹炭任選，而餡料可選豬、雞、牛、肉鬆或沙甸魚。雖然要等，亦起價到每份＄46，但有真係做到脆身同餡料好有越南風味，下次依然會來喔！

山地人越南法包專門店

北角宏安道2-12號宏輝大廈地下9號舖

注 : 鄰近炮台山地鐵站

2013年3月11日星期一

北角百樂

到潮州酒家食飯，點了傳統菜式 :

鹵水拼盤 - 鹵水係潮州食品的靈魂，鹵水唔夠香，非常失望、
炸雙棗 - 分別為蝦蟹棗、蝦棗加有馬蹄粒，較爽口，蟹棗口感香脆
沙爹牛肉芥蘭 - 沙爹醬太多，漿住個咀，蓋過所以牛肉味、
杏汁豬肺湯 - 呢個湯做得非常好，相當滋潤、
蘿白烙 - 味道清新但油到不知得了、
碧綠川椒雞 - 除了油一點外，珍珠葉脆，雞嫩滑

甜品選了水晶飽、反沙芋頭，水晶飽皮略厚身，但味道不錯，反沙芋頭表面沙糖香脆，芋頭香甜。

百樂潮州有幾間，呢間我只可以話合格，還是鍾情於銅鑼灣希慎道百樂。