間中會去粉嶺揾食，如果想食小菜多會到這小店，今次嚟食炸子雞半隻，二人前，再加一道小菜已經夠啦。炸子雞即叫即炸，皮脆肉嫩熱辣辣，記得叫姐姐比碟淮鹽提味更好。店子專賣雞嘅菜式，由白切雞、蔥油雞、口水雞等，還有早利亞冬天至愛嘅客家黃酒走地雞煲或椰子雞煲打邊爐，成隻雞斬好擺上臺慢慢淥，雞肉又嫰又甜，食完暖笠笠。
講返今天點嘅另一道客家鹹菜炆豬肉非常啱佐飯，鹹香惹味，豬腩肉肥美甘香，真係食多2碗飯都未夠。
梅姐果園美食店
粉嶺聯和墟聯昌街42號地舖
粉嶺聯和墟聯昌街42號地舖
2025年5月22日星期四
潮江春二人餐
星期天約了家人到潮江春飲茶，見到有個午市點心二人套餐，當中菜式可以選燒乳鴿好吸引，我哋三人行就點一客套餐加多幾款點心吧。
食住鹹菜等，呢個特色鹹菜有別傳統潮式鹹酸菜，份量足，收費 $20 都抵。點心拼盤先到，包括蝦餃、蟹籽燒賣及潮州粉果。跟住滷水鵝片拼海蜇，滷水香海蜇爽口，墊底豆腐都好入味。
之後嘅前菜三款可選一包括香芒沙律蝦球拼韭菜餅各2件、花姿卷拼酸甜果肉各2件或燒乳鴿一隻，我哋選後者。乳鴿炸得香口肉嫩有肉汁，最後單尾有4個選擇，干炒牛河、瑤柱珍菌炆伊麵、瑤柱蛋白炒飯或方魚瑤柱肉碎粥，雖然份量比正常單叫細碟，但都好足夠。多點蜂巢芋角，外皮炸得好鬆，芋頭亦香，潮州店就食埋芋絲春卷，比鮮蝦又另一種味道，而香茜牛肉腸皮滑味道恰如其分，感覺店子點心都係有心機做，茶錢$17/位，坐得舒服，整體食得滿足。
潮江春
銅鑼灣駱克道463-483號銅鑼灣廣場二期2樓
銅鑼灣駱克道463-483號銅鑼灣廣場二期2樓
請讚好我的專頁 可以收到更多新資訊
也可以follow 我的 Instagram
2025年5月16日星期五
王朝潮順館 (得寶商場)
約埋一班朋友嚟食飯，店子主打潮州及順德菜，預訂了濃湯花膠浸海斑及百花雞，朋友帶咗支柚子酒，再多點一些香口小菜，傾下飲下放鬆下。先嚟威士忌乳鴿 $168，肉質嫩滑有酒香，賣相又靚。椒鹽鮮魷 $148 炸得鬆脆，魷魚鮮甜軟滑。百花雞半隻 $218 反而無想像中咁香，中規中矩，蘸汁食比較好。白灼新鮮鵝腸 $128，鵝腸芽菜爽脆。濃湯花膠浸海斑 $468 湯鮮甜，花膠份量十足，海斑起片浸熟得剛剛好。朋友想試脆皮牛腩 $238，記得早利亞喺金陶軒第一次這菜式，今次潮順館做嘅版本粉漿炸得厚一點，還好牛腩夠軟腍入味。最後嚟個菜，白蜆魚肚蝦乾浸勝瓜 $128，落咗蜆再加勝瓜都知道湯會甜，唔錯唔錯。
甜品炸奶卷 8條 $102 及椰汁西米丸 8件 $96 都可以跟人數落單，椰汁西米丸好特別，咬開仲係流質嘅西米露，不過大家都比較喜歡炸奶卷，外脆內嫩滑，難怪朋友想再 encore。
王朝潮順館
九龍灣牛頭角道3號得寶商場地下A7號舖
2025年5月12日星期一
RUB 一人燒肉下午茶
本來想食另一家的下午茶，時間差幾分鐘就附近周圍行下，見這家燒肉店子有多人在門前等，上前了解，下午茶都有一人燒肉套餐，而且價錢親民，加 $10 仲多一客肉或小食如海苔年糕、玉子燒、泡菜、一口薯等，於是就變心撳張飛排隊等。準時 2點開始安排座位，手機點餐後多等十分鐘就見送餐機械人到來，店員送上套餐及飲品，豬腩肉100g 定食加配牛胸腹 100g 連冷泡玄米茶 $38+$10，亦有樽裝可樂 +$6 、果汁 $12 或手調梳打飲品 + $22 選擇。爐火火力自己控制，醬汁早利亞鍾意淨岩鹽或檸檬薑汁，食埋碗飯好滿足。
RUB
馬鞍山鞍祿街18號MOSTown新港城中心(4期)2樓2141號舖
請讚好我的專頁 可以收到更多新資訊
也可以follow 我的 Instagram
訂閱：
文章 (Atom)