早利亞的美食感覺: 粉嶺梅姐果園美食店

2025年5月29日星期四

粉嶺梅姐果園美食店

間中會去粉嶺揾食，如果想食小菜多會到這小店，今次嚟食炸子雞半隻，二人前，再加一道小菜已經夠啦。炸子雞即叫即炸，皮脆肉嫩熱辣辣，記得叫姐姐比碟淮鹽提味更好。店子專賣雞嘅菜式，由白切雞、蔥油雞、口水雞等，還有早利亞冬天至愛嘅客家黃酒走地雞煲或椰子雞煲打邊爐，成隻雞斬好擺上臺慢慢淥，雞肉又嫰又甜，食完暖笠笠。

講返今天點嘅另一道客家鹹菜炆豬肉非常啱佐飯，鹹香惹味，豬腩肉肥美甘香，真係食多2碗飯都未夠。